الشفافية نيــوز

كلمتين ونص 

إيهاب محمد نصر

انا والله فى الدنيا دى بمغصنى ويطلع ميتينى المسئول المحنط الذى لا يواكب المستجدات، يعنى مثلا الحكومة قالت تانى كاش مافى ولو فى بنطلعو بالقطارة ده طوالى كان يفترض على كل وزراء المالية او مدراؤها فى الولايات يوجهو كل اداراتهم الايرادية بان يفتحو حسابات فى كل البنوك الفيها تطبيقات دون الرجوع للوالى ويتحمل تبعات قراره ده بحيث اذا جاء مريض عاوز يعمل عملية فى المستشفى تكلفتها شئ وشويات ما تقولو ليه ما بنقبل الا كاش! يجيب ليكم كاش من وين وانتو اصلا كحكومة ما عندكم كاش؟! يعنى انتو الا يجيكم مريض بين الحياة والموت وتقولوا ليه عفوا ما بندخلك العناية الا تدفع لينا كاش او ما بنعمل ليك العملية الفلانية الا تجيب لينا كاش ويموت المريض ده ويقوم اهله يطلعو مسدس ولا يسلو سكين يقتلو ليهم دكتور ولا مدير مستشفى عشان تعالجوا الموضوع؟ اول جهه يفترض تفعَل الدفع الالكترونى هى الحكومة نفسها عبر مستشفياتها وضرائبها وجماركها وكل مؤسساتها الايرادية الما تديك الدرب، وكذالك الحال يفترض ما تجدد رخص اى جهه ما لم تبرز ما يوكد انها تمتلك حسابات بنكية فى كل البنوك كل البنوك بلا استثناء اللوائح المالية القديمة المعتتة البتلزم المؤسسات بان تكون حساباتها فى بنك السودان دى تبلوها وتدفقوا مويتها

قال الا كاش قوم لفو ياخ.
كل التفاعلا